Sport

Real je noćas u Varšavi pobijedio Atalantu 2:0 i osvojio Superkup Evrope.

Madriđani su do titule došli golovima Valverdea i Mbapea, koji je pogodio na debiju u novom klubu.

Real je šesti put osvojio Superkup Evrope i po tome je najuspješnija ekipa.

Prvo poluvrijeme nije bilo kvalitetno, Real je prvi zaprijetio preko Mbapea, koji je blokiran, dok je na drugoj strani, nakon centaršuta De Rona, Militao skrenuo loptu i pogodio mjesto gdje se spajaju prečka i stativa.

U finišu prvog poluvremena Real je imao najbolju priliku, a neprecizan je bio Rodrigo koji je pogodio prečku sa oko 10 metara.

Početkom drugog poluvremena najbolju šansu je imala Atalanta - Pašalić je šutirao glavom, a Kurtoa sjajno reagovao i loptu izbacio u korner.

Nakon toga se Real probudio i razigrao i u 59. minutu stigao do prvog gola - Vinisijus je pobjegao Đimsitiju i asistirao Valverdeu, koji se ušetao u gol.

Odmah nakon tog pogotka Muso je zaustavio Vinisijusa, a onda i Belingema.

U 68. minutu je golman Atalante bio nemoćan - Jen je izgubio loptu, Real krenuo u kontru, a Belingem asistirao Mbapeu, koji je na prvom meču u novom klubu postigao gol.

Nova era je zvanično počela.

izvor;Vijesti.me